Sjálfsblekking Sjálfstæðismanna

Það er með ólíkindum hvernig Sjálfstæðismenn reyna endalaust að draga Samfylkinguna inn í spillingarvef sinn. Hlustar þetta fólk ekki á fréttaflutning nema með öðru eyranu? Bókhald Samfylkingarinnar hefur verið opið öllum sem hafa viljað skoða það í mörg ár. Samfylkingin hefur barist fyrir því árum saman að gera bókhald stjórnmálflokka opinbert með  allt uppi á boðinu. Það hefur ekki verið hægt að segja það sama um Framsóknarflokkinn  og Sjálfstæðisflokkinn.

Samfylkingin er að fá álíka mikið í styrki frá öllum styrktaraðilum 2006 eins og Sjálfstæðisflokkurinn er að fá frá einum aðila eða  samtals   36 milljónir á móti 80.9 milljónum Sjálfstæðisflokksins.  Framsóknarflokkurinn er einnig að fá dágóðar upphæðir frá einstaka aðilum og í raun hlutfallslega meira en aðrir miðað við stærð. Framsókn og Samfylkingin eru að fá hæst 5 milljónir frá einu  fyrirtæki. Að mínu mati er það  of mikið frá einum aðila og játa ég það hér og nú að ég er ekki ánægð með minn flokk að þiggja svo háan styrk frá einstaka fyrirtæki.

Ég tók þátt í Prófkjöri Samfylkingarinnar í Norðausturkjördæmi. Í mínum flokki var óskað eftir því að menn eyddu ekki meira en 300 þúsund í prófkjörsbaráttuna, hjá Sjálfstæðisflokknum var hámark 2 milljónir. Það er að mínu mati með öllu ólíðandi að frambjóðendur séu að þiggja háa styrki í prófkjöri frá einstaka styrktaraðilum.

REI málið er kapituli út af fyrir sig  sem þarf sérumfjöllun en að halda því fram að Sjálfstæðismenn hafi komið í veg fyrir sameiningu REI og GGE er með ólíkindum. Í umræðunni um þennan samruna þá kom það aldrei fram að Sjálfstæðismenn væru neitt sérstaklega á móti honum heldur þvert á móti. Eru Sjálfstæðismenn búnir að gleyma blaðamannafundinum sem þeir héldu sjálfir í ráðhúsinu í Reykjavík 8. október 2007. Eða halda þeir kannski að þjóðin sé búin að gleyma honum?  Á Þeim fundi kynntu þeir að selja ætti REI að fullu út úr Orkuveitunni.  Þeir gleymdu hins vegar að kynna þetta fyrir samstarfsflokki sínum en það bjargaði Orkuveitu Reykjavíkur eins og allir muna . Samstarfsflokkurinn gat ekki unað ákvörðun Sjálfstæðismanna og sleit samstarfinu. Þetta muna þeir sem það vilja.

Þorgerður Katrín , Gísli Marteinn og þið hin sem haldið öðru fram, ég bið ykkur hættið að hafa fólk að fíflum.

 

 

Aldrei heyrt alvarlegri ásakanir

Athugasemdir

[Jón Halldór Guðmundsson, 15.4.2009 kl. 13:31]

Já, ætli fólk sé búið að gleyma REI málinu? Það mál ætti að hafa skýrst í ljósi nýlegra frétta.